Ish-kapiteni i Kombëtares së Shqipërisë, Lorik Cana, ka komentuar vendimin e futbollistëve të Kosovës për ta braktisur ndeshjen ndaj Rumanisë në minutat shtesë. 

Në një intervistë për “KosovaPress”, Cana, ka thënë se i ka pëlqyer uniteti te Përfaqësuesja e Kosovës dhe se si u respektua vendimi i kapitenit Amir Rrahmani. 

Por, ai ka shtruar pyetjen nëse do të ishte braktisur ndeshja po të ishte Kosova në epërsi. 

“Mua më pyesin shumë për këtë punë. Nuk besoj se diçka është bërë me dëshirë, me qëllim të keq apo në ndonjë mënyrë të keqe. Kur mua ma bëjnë këtë pyetje, unë ua bëjë një pyetje tjetër shumë të thjeshtë. Nëse ne do të ishim 1-0 duke e fituar atë lojë, a do ta kishim lënë? Merre vet përgjigjen, të kishim qenë ne duke fituar 1-0 në minutën 93’, a do ta kishim lënë lojën? Shumica e njerëzve më thonë: ‘Jo nuk do ta linim’ dhe e kemi përgjigjen”, ka thënë Cana.

Në ndeshjen që u zhvillua në Bukuresht më 15 nëntor, në kuadër të Ligës së Kombeve, lojtarët e Kosovës u larguan nga fusha në minutën e 92-të pas thirrjeve raciste nga tifozët rumunë. Pati fyerje, thirrje “Serbia, Serbia” dhe hedhje të gjësendeve. 

Të enjten UEFA mori vendim që ndeshja t’i takojë Rumanisë me rezultat zyrtar 3:0. 

Kosova në plejof për t’u ngjitur në Ligën B, do të ballafaqohet me Islandën në dy ndeshje që do të zhvillohen në muajin mars të vitit të ardhshëm.

Cana tha se u ndie shumë mirë kur pa se skuadra mbështeti vendimin e kapitenit Rrahmani. 

“Një gjë mua më ka ardhur mirë, kur kapiteni vendosë, e gjithë skuadra ka vendosur si një trup dhe kjo duhet të bazohet si forcë e skuadrës pavarësisht asaj a kanë bërë mirë apo keq. Amiri është kapiten i skuadrës dhe vendimin që e ka marrë ai apo federata mund të jetë i mirë ose i gabuar varësisht si e gjykojnë, mua kur më pyesin a kanë bërë mirë, unë iu them, nëse do ta marrësh përgjigjen, për dy minuta nëse isha duke fituar nuk do ta lija lojën. Gjithsesi faktori i një ekipi të mbledhur dhe që e merr vendimin bashkë, duhet të bazohet në atë forcë për çdo moment që ekipi ka për t’u zhvilluar dhe për çdo sfidë që e ka përpara”, ka thënë tutje Cana.

Cana thekson gjithashtu me bindje të plotë se Kosova nuk e ka vendin në Ligën C, por së paku një rang më lartë, në Ligën B.

“Kosova nuk e ka vendin te Grupi C. Kosova me lojtarët që ka, skuadrën që ka, cilësitë që ka, e ka vendin te Grupi B dhe aty mandej unë mendoj se mund të gjykohet se si mund të jemi dhe në çfarë niveli jemi, pastaj se ku mund të përfaqësohemi në momentin kur fillojmë të garojmë në Grupin B. Plejofi kundër Islandës nuk do të jetë i lehtë por janë ato momente kur duhet të bëhet një hap përpara. I njëjti proces, edhe ky ekip duhet të piqet, edhe ky ekip duhet të luajë edhe pak së bashku edhe kanë nevojë për lojtarët më të mirë që janë në momentin dhe në formën e duhur dhe kjo çndeshja] e marsit jep një shtytje për inkuadrim në Grupin B ku i përket Kosovës sepse nuk e gjykojë unë Kosovën në momentin që e fiton Grupin C, pavarësisht se e ka pasur aty një Rumani por e pamë në ndeshjen e fundit mua Rumania mu duk sikur Andorra, e kjo është meritë e Kosovës”, ka thënë Cana.

Ai nuk ka lënë pa komentuar edhe ecurinë e Kombëtares së Shqipërisë, e cila doli e fundit në grupin e saj në Ligën B dhe ra një rang më poshtë.

“Nuk e di për fjalën dështim, sigurisht se vendi i fundit nuk është i mirë si dhe zbritja një ligë më poshtë, mandej kur luan në Ligën e Kombeve dhe je në Grupin B, pothuajse katër ekipet nuk janë shumë larg njëra tjetrës, dhe në ndeshjen e fundit mund të ishin edhe në vendin e parë por edhe në të fundit, janë detajet. Unë mendoj se cilësia dhe kualiteti është dëshmuar me kualifikimin në Kampionatin Evropian, është një skuadër që thjeshtë duhet të piqet pak dhe duhet të nxjerrë një pjesë të karakterit të vet për t’u rritur por potenciali është aty dhe besoj që e ardhmja do të jetë shumë e mirë”, ka përfunduar Cana.

Kryetari i Federatës së Futbollit të Kosovës (FFK), Agim Ademi, ka paralajmëruar se çështjen e mbrëmshme të ndodhur në Bukuresht, ku kombëtarja e Kosovës lëshoi fushën pas “thirrjeve raciste” dhe “anti-Kosovë” nga shikuesit, do ta dërgojë deri në KAS.

Ademi, përmes një postimi në Instagram, tha se vendimi për të braktisur ndeshjen nuk ishte i lehtë, “por ishte i drejtë”.

“Falënderojmë të gjitha institucionet dhe opinionin publik për përkrahjen e tyre të drejtë dhe të vendosur. Ne sigurojmë se nuk do të ndalemi dhe do të vazhdojmë të kërkojmë drejtësi konform rregulloreve për rastet e tilla politike dhe qëllimkëqija që nuk kanë vend në sport deri në Gjykatën e Arbitrazhit Sportiv (KAS) në Lozanë”, deklaroi kreu i FFK-së.

Ai tha se bazuar në ato që ndodhën në stadiumin e njëjtë, “National Arena” një vit më parë, “nuk kemi pritur që një gjë e tillë të na përsëritet sërish në Rumani”.

Kreu i FFK-së tha se pavarësisht çfarë epilogu ligjor do të ketë kjo ndeshje, “duhet theksuar se ne kemi qenë të lënduar emocionalisht (e sidomos lojtarët) nga provokimet dhe nënçmimi i vazhdueshëm që tifozët rumunë bënë në kor”.

“Kulmi u arrit me incidentin e iniciuar nga disa futbollistë kundërshtarë, çka krijoi një ndjenjë të qartë sulmi, jo vetëm ndaj skuadrës sonë, por ndaj shtetit dhe kombit tonë. Në ato momente të vështira, lojtarët tanë reaguan me dinjitet, dhe ne si Federatë qëndruam krah tyre për të mbrojtur emocionet dhe dinjitetin e tyre dhe të shtetit tonë”, u shpreh Ademi.

Ai tha se vendimi për të lëshuar fushën “ishte një akt i domosdoshëm për të ruajtur integritetin e Kosovës dhe për të mbështetur çdo përpjekje për një sport të pastër dhe të drejtë, ashtu siç janë edhe parimet e UEFA-s e FIFA-s”.

“Futbolli duhet të jetë simbol i fair-play-it dhe bashkimit, veçanërisht në ndeshjet e kalibrit të tillë. Vazhdojmë me krenari dhe përgjegjësi”, potencoi kryetari i FFK-së, Agim Ademi. 

Ndeshja e xhiros së pestë e Ligës së Kombeve e zhvilluar mes Rumanisë e Kosovës është e vetmja ndeshja e cila nuk ka ende një rezultat final.

Ndeshja është ndërprerë 2 minuta para përfundimit të takimit pasi që Kombëtarja e Kosovës nuk ka pranuar ta luaj deri në fund ndeshjen dhe ka dorëzuar ankesë në UEFA kundër nikoqirëve rumunë.

Andaj, UEFA duhet edhe të vendos për epilogun final të këtij takimi.

Xhiroja e fundit e Grupit 2 të Ligës C ku bëjnë pjesë edhe Kosova e Rumania do të zhvillohet të hënën, ku Kosova do të pres në shtëpi Lituanin, ndërsa Rumania do të përballet me Qipron.

Sipas rregulloreve të UEFA-s, vendimi duhet të merret para zhvillimit të xhiros së ardhshme, çfarë do të thotë se UEFA do të mund të dalë me një vendim nesër (e diel), ose më se largu të hënën, para zhvillimit të takimit mes Kosovës e Lituanisë.

Kombëtarja e Kosovës u tërhoq nga ndeshja për shkak të thirrjeve raciste në kor nga ultrasit rumunë duke u ndier të fyer.

Në bazë të rregulloreve të UEFA-s lidhur me mos pranimin e zhvillimit të ndeshjes, FFK-ja mund të përballet me sanksione, megjithatë ende nuk dihet se cili do të jetë epilogu final i këtij takimi.

Deri në ndërprerjen e ndeshjes, rezultati ishte i barabartë 0:0.

Kosova mbante pozitën e dytë në grup me tri pikë më pak se Rumania që është lidere në grup.