Sulmuesi i Barcelonës, Raphinham ka thënë se lodhja është arsyeja kryesore e rënies së formës së skuadrës, teksa synojnë fitoren ndaj Atletico Madrid, për ta mbyllur vitin në vendin e parë.

Barça fitoi 11 nga 12 ndeshjet e para në La Liga këtë sezon, por ka fituar vetëm një nga gjashtë të fundit, duke pësuar humbje befasuese radhazi në shtëpi në ligë nga Las Palmas dhe Leganés.

Atlético, ndërkohë, ka fituar gjashtë radhazi në La Liga dhe shkon në këtë përballje në Stadiumin Olimpik me pikë të barabarta me liderin Barça që ka qenë 10 pikë prapa në fillim të nëntorit.

“Është në dorën tonë,” tha Raphinha për ESPN kur u pyet për rezultatet e dobëta të fundit. “Kemi qenë keq. Kemi rënë nën nivel. Ndoshta na ka munguar përqendrimi në momente dhe kjo na ka kushtuar. Dhe lodhja gjithashtu. Nëse ju them se nuk ishim të lodhur në ndeshje të caktuara kur humbëm pikë, do të gënjeja. Kështu që lodhja mendoj se është faktori më i madh, por ne gjithashtu kemi rënë nën nivelin tonë.”

Skuadra e kufizuar dhe dëmtimet e Barçës kanë bërë që trajneri Hansi Flick të jetë mbështetur në të njëjtin bërthamë lojtarësh që kur mori drejtimin në verë.

Raphinha është një nga 10 lojtarët që kanë shënuar tashmë mbi 1500 minuta këtë sezon. Dani Olmo, i kufizuar nga lëndimet, është i 11-ti me 787 minuta dhe askush tjetër nuk ka luajtur më shumë se 700 minuta në skuadër.

Vetëm Iñigo Martínez (2,046 minuta) dhe Jules Koundé (1,975) – i cili u zbulua këtë javë si futbollisti që ka luajtur më shumë minuta gjatë gjithë vitit 2024 – kanë luajtur më shumë se Raphinha.

Pavarësisht kësaj, braziliani e mbështet Barçën që të kalojë këtë ndeshje të vështirë dhe ka thënë se nëse mund të mprehin fokusin në çdo ndeshje – siç bënë në fitoret kundër Real Madrid, Bayern Munich dhe Borussia Dortmund – ata mund të kthehen në rrugën e duhur.

“Po, [ne do të] kalojmë këtë,” shtoi ai. “Unë kam një tatuazh që thotë se “Gjithçka kalon”, do të thotë kalojnë momentet e këqija dhe ato të mira gjithashtu, kështu që do të kalojë. Po bëjmë mirë, patëm një moment të mirë [në fillim të sezonit], hymë në një moment të keq dhe kjo do të kalojë. Kështu është jeta. Kështu është futbolli dhe jeta është gjithashtu e njëjtë. Ajo që unë mendoj është se duhet t’i qasemi çdo ndeshjeje, çdo skuadre, si skuadra më e fuqishme në botë. Nëse do ta bënim këtë, mendoj se do të ishim shumë më të përqendruar, të mbroheshim së bashku, të sulmonim së bashku dhe më të fokusuar për të shënuar gola. Nëse ne hyjmë në çdo ndeshje duke menduar se është më e rëndësishmja, do të jemi më të mirët”.