Albion Rrahmani, Ermal Krasniqi, Indrit Tuci, Qazim Laçi e Kastriot Imeri janë shqiptarët që sot siguruan me skuadrat e tyre përkatëse Ligën e Kampionëve.

Sparta e Pragës fitoi 2:0 ndaj Malmos, ndërsa Young Boys e mposhti 1:0 Galatasarayn, për ta mundësuar këtë.

Te gjiganti çek luajnë katër futbollistë të cilët përfaqësojnë Shqipërinë apo Kosovën, teksa te Young Boys luan Kastriot Imeri që përfaqëson Zvicrën.

Albion Rrahmani pati debutim ëndrrash, pasi 14 minuta pasi hyri në fushë, ia doli të shënonte për rezultatin përfundimtar.

Sparta e Pragës kishte fituar në udhëtim 2:0 një javë më parë, teksa edhe sot triumfoi me të njëjtin rezultat, për të siguruar një vend në Ligën e Kampionëve.

Nga minuta e parë vetëm Qazim Laçi startoi, por në pjesën e dytë u inkuadruan dyshja kosovare, Albion Rrahmani e Ermal Krasniqi, teksa minuta nuk pati për Indrit Tucin.

Për skuadrën çeke shënoi fillimisht Haraslin në minutën e 80-të nga penalltia, teksa tre minuta më vonë ylli i Kosovës realizoi për rezultatin përfundimtar 2:0.

Pas kësaj fitore, Sparta e Pragës kualifikohet në Ligë të Kampionëve pas 18 vitesh mungesë, teksa futbollistët shqiptarë të lartëcekur do të paraqiten për herë të parë në garën më të fortë për klube në Evropë.

Në anën tjetër edhe Kastriot Imeri, e ka siguruar Ligën e Kampionëve me skuadrën e tij, Young Boys, pasi befasuan gjigantin turk, Galatasaray, duke e mposhtur në të dy ndeshjet, por për mesfushorin kosovar me nënshtetësi zvicerane nuk pati minuta në këtë përballje.

Numrin e shqipëtarëve në Ligën e Kampionëve pritet ta shtojnë Arbër Hoxha e Edon Zhegrova me klubet e tyre, Dinamo Zagreb e Lille, pasi kanë shënuar fitore të thella në ndeshjet e para, teksa nesër do t’i kenë ndeshjet e kthimit.