Liverpooli ka vazhduar me fitore në Premierligë, kësaj radhe duke triumfuar në udhëtimin e vështirë ndaj Bournemouth me rezultat 2:0.
Skuadra e Arne Slot është duke kaluar sezon të jashtëzakonshëm, si në Angli por edhe në Ligë të Kampionëve, ndonëse në përballjen e fundit në Evropë pësuan humbje ndaj PSV-së.
Vitality Stadium ishte vendi pritës i kësaj përballje, me vendasit që janë duke bërë një sezon befasues, ku kanë shkaktuar jo pak probleme për skuadrat e forta elitare të Anglisë.
Liverpooli ishte skuadër më e mirë për një nuancë përgjatë tërë takimit, ndonëse edhe Bournemouth pati shanset për të shënuar.
Të dy golat e fitores i shënoi Salah, që po kalon një nga sezonet më të mira të karrierës.
Lideri aktual i Premierligës kaloi në epërsi pas 30 minutave lojë, kur Mohamed Salah, shënoi nga penalltia për 1:0.
Tetë minuta më vonë u barazua rezultati, por pas intervenimit të VAR-it, goli u anulua për pozitë jashtë loje dhe 45 minutat e parë u mbyllën me epërsinë minimale të Liverpoolit.
Njëjtë si në pjesën e parë, edhe në pjesën e dytë u shënua vetëm një gol.
Mohamed Salah e realizoi golin e dytë personal, kësaj radhe nga loja e hapur, për ta dyfishuar rezultatin në minutën e 75-të.
Deri në përfundim nuk pati ndryshim në rezultat dhe tani Liverpooli me fitoren 2:0, shkon në kuotën e 56 pikëve pas 23 ndeshjeve, apo nëntë pikë më shumë se dy ndjekësit më të afërt, Arsenal e Nottingham Forest.
Përballjet tjera në Premierligë
Everton 4:0 Leicester;
Ipswich 1:2 Southampton;
Newcastle 1:2 Fulham.
