Galatasaray ka pësuar një disfatë të thellë në fazën “play-off” të Europa League, duke u mposhtur 4-1 nga AZ Alkmaar në Holandë. Ndërkohë, Roma nuk ia ka arritur ta ruajë avantazhin ndaj Porto, duke u ndarë në barazim 1-1.
Në ndeshjen e zhvilluar në “AFAS Stadion”, vendasit kanë kaluar në epërsi pas vetëm dymbëdhjetë minutash lojë me golin e Mijnans. Galatasaray ka reaguar shpejt dhe e ka barazuar rezultatin pas tetë minutash me golin e Sallai. Megjithatë, një goditje e saktë nga penalltia e Parrott në fund të pjesës së parë e ka rikthyer epërsinë e AZ Alkmaar, duke i çuar ekipet në pushim me shifrat 2-1.
Në pjesën e dytë, holandezët kanë dominuar plotësisht dhe kanë shënuar edhe dy herë të tjera. Clasie ka realizuar në minutën e pesëdhjetë e tetë për 3-1, ndërsa Wolfe e ka vulosur rezultatin përfundimtar 4-1 në minutën e gjashtëdhjetë e gjashtë, duke i vështirësuar ndjeshëm gjasat e Galatasaray për kualifikim.
Ndërkohë, në sfidën e luajtur në “Estadio do Dragao”, Porto dhe Roma janë ndarë në barazim 1-1. Italianët kanë kaluar të parët në epërsi me golin e Çelik në fundin e pjesës së parë, por vendasit kanë reaguar në minutën e gjashtëdhjetë e shtatë me golin e Moura, duke lënë gjithçka të hapur për ndeshjen e kthimit./RTK
