E nisi në mënyrën më të dobët të mundshme sezonin e ri në Superligën e Kosovës.
Dukagjini, i drejtuar nga Ismet Munishi, pësoi gjashtë humbje në tetë ndeshjet e para, dhe secili futbolldashës e shihte klubin nga Klina si të parin që do të bie nga liga.
Mirëpo, kështu nuk mendoi edhe Ismet Munishi, i cili njihet si fitimtar në këso situate.
Dukagjini i tij arriti të mbledhë forcat, duke u bërë një “arrë e fortë” për klubet e Superligës.
Janë bërë pothuajse dy muaj qëkur Dukagjini e ka pësuar humbjen e fundit në Superligë. “Hithat” u mposhtën më 4 tetor nga Ferizaj me shifrat 2-1, dhe që nga ajo kohë nuk kanë kthyer më kokën pas.
Pesë ndeshje, tri fitore dhe dy barazime, është balanci pozitiv i Dukagjinit.
Barazim ndaj kampionit në fuqi, fitore ndaj Llapit dhe po ashtu fitore ndaj Gjilanit si mysafir.
Dukagjini për momentin zë vendin e gjashtë në tabelë me 17 pikë nga 13 ndeshje të luajtura.
Klubi nga Klina sot luan përballë Malishevës në “Liman Gegaj”./GazetaExpress/
