Trajneri i Real Madridit, Carlo Ancelotti, doli në një konferencë për shtyp pas fitores ndaj Valencias me rezultatin 2-1, në ndeshjen e shtyrë të javës së dymbëdhjetë të La Liga-s.

Ancelotti tha:

“Skuadra arriti të reagojë përballë vështirësive si kartoni i kuq, penalltia e humbur dhe goli i anuluar. Është e vështirë të shpjegohet sa keq luajtëm në pjesën e parë dhe sa mirë luajtëm në të dytën.”

Ai shtoi:

“Ishte një fitore e merituar me tre pikë, por nuk mund të paraqesim dy fytyra kaq të ndryshme: pjesa e parë ishte shumë e dobët me mungesë ekuilibri, ndërsa pjesa e dytë ishte shumë e mirë, edhe me dhjetë lojtarë.”

Duke vazhduar, ai tha:

“Unë i përgëzova lojtarët në dhomën e zhveshjes dhe u thashë të njëjtën gjë që po ju them juve. Pjesa e parë ishte shumë e keqe, ndërsa e dyta ishte e shkëlqyer. Pas golit, filluam të luanim si duhet dhe, me gjithë vështirësitë, ishte një fitore e merituar.”

Lidhur me kartonin e kuq të Vinicius Junior, ai theksoi:

“Ne menduam se si Vinicius, ashtu edhe portieri i Valencias meritonin nga një karton të verdhë secili, por ata i dhanë karton të kuq Viniciusit. Ne do ta apelojmë këtë vendim, por nuk e di nëse do të pranohet apo jo. Kishte një kontakt nga Dimitrievski dhe më pas një shtyrje nga Vinicius. Dy paralajmërime do të kishin mjaftuar.”

Duke folur për performancën e Vinicius Junior, ai shtoi:

“Vinnie vuajti. Në pjesën e parë ai luajti më shumë nga krahët dhe tentoi të bëjë lojën e tij. Ndonjëherë i shkonte mirë dhe ndonjëherë jo aq shumë. Shpresoj që të luajë ndeshjen e ardhshme, sepse është ende një lojtar vendimtar për ne.”

Për penalltinë e humbur nga Bellingham, ai tha:

“Dmitrievski nuk kishte këmbën mbi vijën e portës, por pasi nuk preku topin, nuk kishte arsye për ta përsëritur penalltinë. Ata menduan se nuk kishte ndërhyrje dhe nuk e urdhëruan përsëritjen e saj. Më shqetëson fakti që kemi humbur tre penallti, dhe unë duhet të marr përgjegjësinë për të vendosur se kush do t’i ekzekutojë ato.”

Lidhur me performancën e Bellingham, Ancelotti tha:

“Bellingham luajti një ndeshje të shkëlqyer. Penalltia e humbur i dha më shumë motivim dhe në 30 minutat e fundit ai tregoi klas të lartë. Ai punoi dhe ndihmoi Mbappé përpara. Goli ishte shpërblimi për ndeshjen që bëri.”

Në përfundim, për Camavinga-n, ai tha:

“Mendy e bëri lojën e tij dhe, pasi Vinicius u përjashtua, na duhej një lojtar si Camavinga që të luante më shumë në qendër. Sipas mendimit tim, Mendy zhvilloi një ndeshje të mirë.”